Ashleigh Stumler hélt hún væri með svima vegna þunna loftsins á Everest. En leiðsögumaðurinn sagði henni að þetta væri eitthvað allt annað. Öflugur jarðskjálfti var að hrista rætur hæsta fjalls heims. Stumler er á meðal þeirra sem lifðu hörmungarnar af. Að  minnsta kosti 17 létust í snjóflóðum sem urðu á og við Everest. 

Eve Girawong, læknir í grunnbúðum Everest, grófst í snjóflóði vegna skjálftans á laugardag. Hún er talin af. „Hjartans dóttir okkar, systir og vinur var tekin frá okkur,“ skrifar fjölskyldan á Facebook, að því er fram kemur í fréttaskýringu á vef CNN þar sem sögur þeirra sem lifðu af og einnig þeirra sem létust eru sagðar.

Kvikmyndaframleiðandinn Tom Taplin hafði verið í grunnbúðum Everest í um mánuð. Þar var hann taka heimildarmynd um samfélag fjallgöngufólks sem hefst ár hvert við í búðunum. Hann var einn þeirra sem létust í snjóflóði sem fór yfir grunnbúðirnar.