Erlent | mbl | 28.4.2015 | 14:54

Þörf á 30.000 sérfræðingum

Franska sjónvarpsstöðin TV5Monde varð fyrir netárás fyrr í þessum mánuði. Þrjótarnir tóku m.a. yfir heimasíðu stöðvarinnar og samfélagsmiðlaaðganga. Þeir sem lýstu árásinni á hendur sér sögðust hafa tengsl við hryðjuverkasamtökin Ríki íslam. AFP

Sérfræðingar hafa varað við skorti á einstaklingum með sérþekkingu á sviði netöryggis. Mark Goodwin hjá Virgina Tech í Bandaríkjunum, segir að líklega séu þeir sem eru sannarlega hæfir til að takast á við sífjölgandi öryggisógnir innan við 1.000 á heimsvísu.

Goodwin, sem fer fyrir verkefni á vegum háskólans sem miðar að því að gera bragarbót á, segir að til að takast á við vandann þurfi 30.000 sérfræðinga til viðbótar.

„Við erum að horfa upp á netnjósnir og netskemmdarverk sem kalla á að við höfum yfir að ráða sérhæfðum einstaklingum til að takast á við ógnina,“ sagði Goodwin á ráðstefnu í Sádi Arabíu í dag.

Á sömu ráðstefnu sagði Saleh Ibrahim al-Motairi, framkvæmdastjóri nýrrar netöryggismiðstöðvar landsins, að nauðsynlegt væri að byggja innviði til að stuðla að aukinni getu til að takast á við netógnir.

Hann sagði mannauðinn númer eitt í þessu samhengi, en tæknina í öðru sæti.

Árið 2012 varð sádiarabíska olíufyrirtækið Aramco fyrir netárás, sem bandaríska leyniþjónustan rakti til Íran. Alvarlegum árásum af þessu tagi hefur farið fjölgandi síðustu ár.