Stefnir í hitamet

Það virðist margt benda til þess að nýtt hitamet verði sett í Bretlandi síðar í mánuðinum en veðurstofur spá nú annarri hitabylgju þar í landi.

Á vef Telegraph kemur fram að spáin hljóði upp á 38,5 gráður á celsíus (101 gráðu á fahrenheit) eða meira í lok júlí sem er hæsta hitastig sem hefur mælst í Bretlandi. Fyrra metið er 38,5 gráður en það met var sett í Brogdale í Kent 10. ágúst 2003. Það ár létust um 70 þúsund Evrópubúar í hitabylgju sem geisaði víða í álfunni í júlí og ágúst.

Í síðustu viku var sett nýtt hitamet fyrir júlímánuð í Bretlandi er hitinn fór yfir 35 gráður en nú hefur kólnað á ný og hitinn um 20 gráður. 

Veðurspár benda til þess að líkt og í síðustu viku muni önnur hitabylgja ríða yfir Suður- og Mið-Evrópu í lok júlí og byrjun ágúst. 

Þrátt fyrir að það hafi kólnað í Bretlandi og Skandinavíu er enn heitt í suðurhluta Spánar en þar hafa skógareldar geisað að undanförnu.