56 látnir eftir aurskriðu

Allavega 56 manns létust þegar aurskriða gróf niður heilt þorp í útjaðri höfuðborgar Gvatemala aðfaranótt föstudags. Enn er nokkur hundruð manns saknað, en skriðan eyðilagði 125 heimili. Um 3.000 manns misstu heimili sitt í hamförunum.

Lögregla, hermenn, sjálfboðaliðar og björgunarsveitir hafa unnið hörðum höndum að því að leita í rústunum. Yfirvöld segja að um 600 sé enn saknað, en 34 hefur verið bjargað úr skriðunni. Þá slösuðust 25 aðrir í hamförunum.

Fjölskyldur hafa tilkynnt um textaskilaboð sem þær hafa fengið frá fólki sem talið er að sé fast undir skriðunni.

Yfirvöld á svæðinu höfðu beðið fólk sem bjó í nokkrum þorpum þar sem hætta var talin vera á aurskriðum að yfirgefa heimili sín og flytjast annað. Síðast óskuðu stjórnvöld eftir því í nóvember á síðasta ári.