Tæplega 500 árásir hafa verið gerðar á heimili hælisleitenda í Þýskalandi það sem af eru þessu ári og eru þær þrefalt fleiri miðað við sama tíma í fyrra. Ríkisstjórn Þýskalands greinir frá þessu.
Thomas de Maizière, innanríkisráðherra landsins, segir að þetta sé til skammar. Hann segir ennfremur að heimamenn sem hafi ekki áður komist í kast við lögin, beri ábyrgð á tveimur af hverjum þremur árásum.
Ráðherrann segir að taka verði hart á þeim sem ráðist á hælisleitendur. Í einhverjum tilfellum hefur verið ráðist á tómar byggingar en einnig á gistiheimili þar sem hælisleitendur hafa fundið skjól.
Maizière segir að þeir sem beri ábyrgð verði að skilja það að þeir eru að „fremja óviðandi brot; líkamsárásir, tilraunir til manndráps og íkveikju,“ sagði hann.
Fram kemur á vef breska ríkisútvarpsins, að Þjóðverjar búist við að taka á móti að minnsta kosti 800.000 hælisleitendum á þessu ári.
Stjórnmálaleiðtogar í Bæjaralandi hafa krafist þess að þýsk stjórnvöld setji þak á þann fjölda sem tekið verði á móti. Hægriflokkurinn CSU mótmælir stefnu Angelu Merkel Þýskalandskanslara, sem hafi opnað landamærin fyrir flóttafólki.
Þýska þjóðin er klofin í afstöðu til stefnu kanslarans varðandi móttöku flóttafólks frá Sýrlandi, Írak og öðrum stríðshrjáðum svæðum. Stefnan nær ekki til þeirra sem eru að flýja fátækt frá öðrum löndum utan Evrópusambandsins.