„Limljóðskáld“ látið laust

Ungum manni, sem var fangelsaður fyrir að deila örljóði sem fjallaði um að hann væri með húðflúr af forseta Búrma á getnaðarlim sínum, var sleppt í dag eftir hálfs árs fangelsisvist. Ljóðskáldið var sakfellt fyrir ærumeiðingar í garð forsetans.

Maung Saungka er 24 ára gamall en hann var handtekinn í nóvember. Glæpur hans var að deila stuttri stöku á Facebook sem hljóðaði einhvern veginn á þessa leið: „Húðflúr af forsetanum á lim mínum, konan mín fann fyrir viðbjóði þegar hún giftist mér.“

Hann var sakfelldur á þriðjudag fyrir ærumeiðingar á netinu og var hann dæmdur í sex mánaða fangelsi. Þar sem hann hafði þegar afplánað svo langan tíma var honum sleppt.

Ekki kom fram í ljóðinu hvort húðflúrið væri af þáverandi forseta Búrma, Thein Sein, fyrrverandi herforingja sem eftirlét borgaralegri ríkisstjórn undir forystu Aung San Suu Kyi völdin fyrr á þessu ári.

Saungkha hefur neitað því að hann beri slíkt húðflúr í raun.

• Blogga um frétt