Grísk yfirvöld byrjuðu að rýma búðir sem flóttamenn hafa komið upp nærri Idomeni við norðurlandamæri landsins að Makedóníu. Aðgerðirnar hófust við dögun og verða þúsundir flóttamanna færðar í betur skipulagðar flóttamannabúðir. Flóttafólkið hafði áður neitað að færa sig.
Lögreglumenn stöðvuðu fréttamenn í að fara inn í búðirnar í morgun en þeir sáu rútur flytja lögreglumenn þangað inn á meðan þyrlur sveimuðu yfir. Óeirðalögregla tekur þátt í aðgerðunum en embættismenn segja að ekki standi til að beita valdi við flutning fólksins.
Búðirnar í Idomeni spruttu upp í febrúar eftir að landamærunum að Makedóníu var lokað. Um átta þúsund manns, flótta- og farandfólk, urðu þá strandaglópar þar. Fólkið kemur flest frá átakasvæðum Sýrlands, Íraks og Afganistans og hefur haldið til við illan kost í tjöldum. Það hefur fram að þessu hunsað tilmæli grískra yfirvalda um að færa sig í skipulagðar flóttamannabúðir vegna þess að það vill ekki fara fjær landamærunum, að því er kemur fram í frétt BBC.
Til stendur að ljúka brottflutningi flóttamannanna á tíu dögum., að sögn blaðamanns þýska tímaritsins Der Spiegel sem er á staðnum.