Frá og með 1. janúar 2017 verður kynáttunarvandi ekki lengur flokkaður sem geðsjúkdómur í Danmörku. Þetta var samþykkt í heilbrigðisnefnd danska þingsins í dag, en hingað til hefur fólk í kynáttunarvanda verið greint með geðsjúkdóm.
„Það er virkilega óviðeigandi að kalla þetta sjúkdóm,“ sagði Flemming Moller Mortensel, varaformaður nefndarinnar, í samtali við AFP fréttastofuna. Þá sagði hann að félag transfólks í Danmörku hafi lengi barist fyrir þessum breytingum.
Lagabreytingunum er einnig ætlað að þrýsta á Alþjóðaheilbrigðismálastofnunina (WHO) um að taka kynáttunarvanda af lista sínum yfir geðsjúkdóma.
Amnesty International fagnar ákvörðun Dana, og segir landið með þessu setja fordæmi fyrir önnur lönd hvað varðar réttindi transfólks.