Lögreglan í Tyrklandi hefur handtekið náskyldan frænda tyrkneska klerksins Fethullah Gulens í tengslum við misheppnuðu valdaránstilraunina í síðustu viku.

Tyrkneskir fjölmiðlar greindu frá þessu í dag. Frændinn, Muhammet Sait Gulen, verður færður í varðhald í Ankara, höfuðborg landsins, en hann dvelur nú í borginni Erzurum í austurhluta landsins.

Eins og kunnugt er sakar Recep Tayyip Erdogan, forseti Tyrklands, Fethullah Gulen um að standa á bak við valdaránstilraunina. Fethullah Gulen er í sjálfskipaðri útlegð í Bandaríkjunum.

Í maí á þessu ári var annar frændi Fethullah handtekinn í tengslum við skólana sem hreyfing Fethullah, Hizmet, rekur, að sögn tyrkneskra fjölmiðla.

Hreyfingin hefur rekið skóla í tugum landa, meðal annars í Afríku, Kasaktstan, Pakistan og Bandaríkjunum, með stuðningi auðugra kaupsýslumanna í Tyrklandi.

Fethullah, sem var eitt sinn náinn bandamaður Erdogans, hefur vísað ásökunum tyrkneskra stjórnvalda á bug.

„Erdogan er svo valdagráðugur að hann heldur að allir séu það líka. Hann er kominn af fátæku fólki og býr núna í mörgum höllum. Velgengni og völdin hafa gjörspillt honum,“ hefur Gulen sagt.

Tyrknesk stjórnvöld hafa krafist þess að Bandaríkjamenn framselji hann til Tyrklands.

Tengdar fréttir

Tyrkland

Tyrkir vilji hleypa nýju pólitísku andrúmslofti inn

• Átök í Tyrklandi á kjördag
• Erdogan ýjar að starfslokum sínum
• Myndskeið: Erdogan syngur fyrir aðdáendur
• Staðfestir sigur Erdogans

» Fleiri tengdar fréttir

• Blogga um frétt