Öryggissveit Receps Tyyips Erdogans, forseta Tyrklands, verður leyst upp eftir að tæplega 300 hermenn úr henni voru handteknir í kjölfar valdaránstilraunarinnar misheppnuðu í síðustu viku.

Binali Yildirim, forsætisráðherra Tyrklands, sagði í viðtali við tyrkneska sjónvarpsstöð í gærkvöldi að „engin þörf“ væri fyrir öryggissveitina.

Fyrr um daginn handtóku tyrknesk stjórnvöld náskyldan frænda klerksins Fethullahs Gulens, sem þau saka um að hafa staðið á bak við valdaránstilraunina.

Lykilráðgjafi Gulens var jafnframt handtekinn í gær, að því er segir í frétt breska ríkisútvarpsins.

Erdogan hefur staðið fyrir miklum pólitískum hreinsunum í kjölfar þess að valdaránstilraunin var brotin á bak aftur fyrir rúmri viku. Um sex þúsund opinberir starfsmenn hafa verið handteknir eða reknir úr starfi, þar á meðal kennarar, hermenn, ráðuneytisstarfsmenn og lögreglumenn.

Erdogan lýsti yfir þriggja mánaða neyðarástandi í landinu á miðvikudag. Um leið voru samþykkt ný neyðarlög sem veita tyrkneskum stjórnvöldum ríkar heimildir til þess að setja lög, án aðkomu þingsins, og skerða frelsi og borgaraleg réttindi manna.

Tengdar fréttir

Tyrkland

Tyrkir vilji hleypa nýju pólitísku andrúmslofti inn

• Átök í Tyrklandi á kjördag
• Erdogan ýjar að starfslokum sínum
• Myndskeið: Erdogan syngur fyrir aðdáendur
• Staðfestir sigur Erdogans

» Fleiri tengdar fréttir

• Blogga um frétt