Karlmaður fannst á lífi eftir að hafa verið á reki undan ströndum Massachusetts í viku. Móðir mannsins, sem einnig var um borð í báti þeirra, er enn ófundin.
Í frétt Sky-fréttastofunnar kemur fram að Nathan Carman, 22 ára, og móðir hans Linda, 54 ára, hafi lagt af stað í veiðiferð frá höfninni í Rhode Island þann 18. september.
Þau voru í litlum báti sem talinn er hafa sokkið. Strandgæslan segir að sonurinn hafi fundist á reki á gúmmífleka í gær. Það var áhöfn flutningaskips sem kom auga á hann í sjónum.
Ungi maðurinn er sagður vera heill heilsu. Hins vegar hefur enn ekkert spurst til móður hans. Strandgæslan hóf leit að bátnum er hann skilaði sér ekki í land. Leitinni var hætt á föstudag.
Flutningaskipið er enn á hafi úti en er væntanlegt til hafnar á morgun.