Yfirvöld í Sádi-Arabíu hafa varað við „hörmulegum afleiðingum“ eftir að ný lög voru samþykkt í Bandaríkjunum sem eiga að koma í veg fyrir að ríki njóti friðhelgi í þeim tilfellum þar sem þau eru ábyrg fyrir hryðjuverkaárásum sem leiða til dauða bandarískra ríkisborgara á bandarískri grund.
Frétt mbl.is: Frumvarpið hættulegt fordæmi
Frétt mbl.is: Þingið snýst gegn Obama
Frumvarpið mun gera ættingjum fórnarlamba árásarinnar 11. september 2001 kleift að fara í mál við Sádi-Arabíu sem tengd hafa verið við hryðjuverkin, þar sem tæplega 3.000 manns létu lífið. 15 þeirra 19 sem stóðu að árásunum voru sádiarabískir ríkisborgarar. Stjórnvöld í landinu, sem hefur lengi verið bandamaður Bandaríkjanna, hafna hins vegar alfarið ábyrgð.
Utanríkisráðherra Sádi-Arabíu kallaði í dag eftir því að Bandaríkjaþing gerði nauðsynlegar ráðstafanir vegna laganna til að koma í veg fyrir hörmulegar afleiðingar fyrir samskipti ríkjanna.
Barack Obama, forseti Bandaríkjanna, hafði áður notað neitunarvald til að koma í veg fyrir að lögin yrðu samþykkt, en í gær kusu bæði öldungadeild Bandaríkjaþings og þingið gegn neitun hans.