Norskur áfrýjunardómstóll staðfesti í dag að klerkurinn Mullah Krekar verði framseldur til Ítalíu. Þar bíður hans ákæra vegna aðildar að fyrirhuguðum hryðjuverkum.
Héraðsdómurinn í Osló ákvað í júní að hinn 60 ára gamli Krekar yrði framseldur. Hann er stofnand hryðjuverkasamtakanna Asnal al-Islam og hefur verið tengdur við samtökin Ríki Íslams.
Krekar, sem er íraskur Kúrdi, hefur búið í Noregi frá árinu 1991 en hann fékk pólitískt hæli í Noregi á sínum tíma. Ítalir saka hann um að standa á bak við samtök sem hafa skipulagt árásir í Evrópu.
Krekar hafði áfrýjað niðurstöðunni frá því í júní en áfrýjun hans var hafnað í dag.
Lögfræðingur Krekars, Brynjar Meling, sagði AFP-fréttaveitunni að skjólstæðingur hans myndi núna láta reyna á málið fyrir hæstarétti.
Lögfræðingurinn sagði að Krekar hefði eingöngu reynt að stofna stjórnmálahreyfingu í Írak. „Þetta kemur hryðjuverkum ekkert við,“ sagði Meling.
Krekar hefur tvívegis verið dæmdur til fangelsisvistar í Noregi fyrir ofbeldisfulla hegðun og hótanir.
Honum hefur verið vísað frá Noregi, því hann er skilgreindur sem hættulegur öryggi borgaranna. Aftur á móti bíður hans dauðarefsing í Írak og því hafa Norðmenn ekki framfylgt brottvísuninni.