Lögregla og slökkvilið hafa sett spurningarmerki við öryggismál byggingar þar sem að minnsta kosti 24 létust eftir stórbruna í Oakland í Kaliforníu. Talið er að tala látinna eigi eftir að hækka, en óttast er að hátt í 40 hafi látist.
Byggingin er gamalt vöruhús, sem er þekkt undir nafninu Draugaskipið (e. Ghost Ship), en húsinu hafði verið breytt í listasmiðju. Eldur braust út þegar ungmenni voru að skemmta sér á tónleikum.
Teresa Deloche-Reed, slökkviliðsstjórinn í Oakland, segir að engir vatnsúðarar hafi verið í byggingunni. Þá hafi verið gríðarlega mikið af alls kyns munum og húsgögnum í húsinu. Þá hafi engir brunaboðar verið í húsinu. Þetta kemur fram á vef BBC.
Lögreglan segir að eina leiðin upp á aðra hæð hússins hafi verið stigi sem hafi verið búinn til úr vörubrettum úr tré.
Slökkviliðsstjórinn segir að á bilinu 50-100 manns hafi verið í teitinni þegar eldurinn kviknaði á föstudagskvöld. Elektroníska danshljómsveitin Golden Donna hélt tónleika á staðnum ásamt sex öðrum sveitum þegar húsið fór að loga.
Þak hússins gaf sig í brunanum en það féll á aðra hæð hússins, en hluti gólfsins gaf sig í framhaldinu og féll niður á jarðhæðina.
Maður, sem er sagður hafa átt þátt í að koma upp listasmiðjunni, hefur verið harðlega gagnrýndur fyrir færslu sem hann setti á Facebook. Hann sagði að allt sem hann hefði unnið að svo lengi sé nú farið, en það sem hefur farið fyrir brjóstið á fólki er sú staðreynd að hann minntist ekki fólksins sem lést í brunanum.