Fjórtán manns hið minnsta hafa farist í flóðum í kjölfar úrhellisrigningar í Taílandi undanfarna daga. Taílensk stjórnvöld hafa skilgreint stóran hluta flóðasvæðanna sem hamfarasvæði og hafa lýst yfir neyðarástandi í 11 héruðum í sunnanverðu landinu, en úrhellisrigning og aurskriður hafa m.a. rofið járnbrautarlínur í suðurhluta landsins.
Meðal þeirra staða sem hafa farið illa út úr flóðunum eru vinsælir ferðamannastaðir á borð við Krabi, Koh Samui og Koh Pha-nangan.
Flóðin hafa áhrif á tæplega 600.000 manns, sagði í yfirlýsingu frá taílenska innanríkisráðuneytinu. Fjórtán hafi farist, þrír til viðbótar hafi slasast og þá sé eins saknað.
Svo miklar rigningar á þessum árstíma eru óvanalegar á Taílandi, en desember og janúar eru vinsælustu ferðamannamánuðir ársins og því einkar mikilvægir fyrir efnahag ríkisins, sem hefur átt erfitt með að ná sér á strik eftir að herinn tók yfir stjórn landsins árið 2014.
„Það hefur verið meiri úrhellisrigning en venjulega, sem hefur valdið erfiðleikum með niðurföll,“ hefur Reuters-fréttastofan eftir Nongyao Jirundom hjá ferðamálayfirvöldum á Samui-eyju.
Mikil flóð urðu í Taílandi 2011 sem kostuðu rúmlega 900 manns lífið og ollu miklum truflunum á iðnaði.