Leit stendur enn yfir að fólki í rústum þeirra húsa sem hrundu í öflugum jarðskjálfta á eyjunni Súmötru í Indónesíu á þriðjudagskvöld. 102 hið minnsta létu lífið í skjálftanum, sem mældist 6,5 stig, og um 600 manns slösuðust.
Rúmlega 200 byggingar hrundu til grunna í jarðskjálftanum og óttast yfirvöld að margir séu enn fastir í húsarústum í Pidie Jaya-sýslu í Aceh-héraði, þar sem áhrifanna varð hvað mest vart.
Frétt mbl.is: 97 fundist látnir eftir jarðskjálftann
Þúsundir íbúa misstu heimili sín og hafa þurft að leita skjóls í neyðarskýlum og vinnur indónesíski Rauði krossinn, ásamt yfirvöldum, nú að því að koma neyðarvistum til fólks.
Þúsundir hermanna og björgunarsveitarmanna sinna nú björgunarstarfi á vettvangi og þá hafa indónesísk yfirvöld tilkynnt að fleiri vinnuvélar verði sendar á staðinn til að auðvelda björgunarstarf.
Fréttaritari BBC í bænum Meureudu, þar sem skemmdir urðu hvað mestar, segir björgunarstarf beinast hvað mest að byggingunum sem standa við markað bæjarins þar sem 20 manns var bjargað úr rústum í gær.
Um 245 byggingar skemmdust eða eyðilögðust í Pidie Jaya og Bireuen, sem er nærliggjandi sýsla. Þá hafa einnig orðið miklar skemmdir á vegakerfi eyjunnar og rafmagn liggur víða niðri.
Um 150.000 manns búa í Pidie Jaya sem er við norðurströnd Aceh og um 110 km frá héraðshöfuðborginni Banda Aceh.
Fréttavefur BBC hefur eftir Hamdani, einum íbúanna, að jarðskjálftinn nú hafi verið öflugri en 2004, þegar meira en 160.000 manns létu lífið í Indónesíu af völdum flóðbylgju.
„Við hlupum strax út. Heimili okkar er við hafið þannig að við vildum komast í örugga fjarlægð; við lærðum þá lexíu frá flóðbylgjunni,“ sagði Hamdani.
Engin flóðbylgjuviðvörun var gefin út vegna jarðskjálftans í gær, sem varð á litlu dýpi í Pidie Jaya-sýslu.