Bandarísk stjórnvöld ætla að senda um 200 hermenn til Sýrlands til viðbótar við þá sem þegar eru í landinu til þess að aðstoða bandalag kúrdískra og arabískra hersveita við að taka borgina Raqa sem verið hefur á valdi hryðjuverkasamtakanna Ríkis íslams.
Þetta tilkynnti Ash Carter, varnarmálaráðherra Bandaríkjanna, í dag á ráðstefnu í Manama, höfuðborg Bahrain, samkvæmt frétt AFP. Fyrir væru um 300 bandarískir sérsveitarmenn sem væru til aðstoðar við að taka Raqa. Bandaríkjamenn væru einnig að aðstoða við að taka borgina Mosul í Írak. Borgirnar tvær eru síðustu stóru þéttbýlisstaðirnir á valdi Ríkis íslams.
Carter sagði að á meðal hermannanna 200 væru meðal annars sprengjusérfræðingar, hermenn með reynslu af herþjálfun og sérsveitarmenn.