Erlent | AFP | 1.3.2017 | 13:19 | Uppfært 20:01

Lávarðar leggja stein í götu May

Lávarðadeild breska þingsins. AFP

Lávarðadeild breska þingsins mun að öllum líkindum leggja stein í götu forsætisráðherrans Theresu May með því að samþykkja viðauka Verkamannaflokksins við Brexit-frumvarp ríkisstjórnarinnar, þess efnis að ríkisborgarar Evrópusambandsríkja búsettir í Bretlandi njóti óbreyttra réttinda eftir að Bretar ganga úr sambandinu.

Atkvæðagreiðsla um málið fer fram í dag. Ef þingmenn lávarðadeildarinnar samþykkja viðaukann fer málið aftur til neðri deildar þingsins.

Umrædd löggjöf veitir May heimild til að virkja 50. grein Lissabon-sáttmálans en við það hefjast tveggja ára viðræður um skilmála úrsagnar. Gera má ráð fyrir að málefni innflytjenda verði efst á baugi í viðræðunum.

Eins og sakir standa eru örlög þeirra þriggja milljóna ríkisborgara Evrópusambandsríkja sem búsettir eru í Bretlandi óráðin. Ríkisstjórnin hefur sagst munu tryggja rétt þeirra til að búa áfram í Bretlandi en hefur ekki viljað gefa loforð þar um.

Það gustar um Theresu May þessa dagana og hún hefur nóg á sinni könnu. AFP

May hefur sagt að Bretar geti ekki tekið einhliða ákvörðun hvað þetta varðar, heldur verði að skoða þetta í samhengi við rétt þeirra 1,2 milljón bresku þegna sem búa í ríkjum Evrópusambandsins.

Leiðtogi Verkamannaflokksins í lávarðadeildinni, barónessan Angela Smith, hefur hins vegar sakað forsætisráðherrann um að ætla að nota fólkið sem vogarafl í samningaviðræðunum við ESB.

Viðauki Verkamannaflokksins kveður á um að ríkisstjórnin fái þriggja mánaða frest til að grípa til aðgerða til að tryggja rétt þeirra íbúa Bretlands sem eiga ríkisfang í öðrum Evrópusambandsríkjum.

Innanríkisráðherrann Amber Rudd reit þingmönnum lávarðadeildarinnar bréf þar sem hún hvatti þá til að tefja ekki frumvarp ríkisstjórnarinnar, en það virðist ekki hafa borið tilætlaðan árangur.