„Það versta er yfirstaðið,“ sagði Blairo Maggi, landbúnaðarráðherra Brasilíu, en kjöthneyksli hefur skekið landið undanfarið. Erlendir markaðir hafa sniðgengið kjötvörur frá landinu eftir að í ljós kom að innihaldslýsingar þeirra reyndust meðal annars hafa vera falsaðar. Kjötvörurnar voru seldar innanlands og á erlenda markaði.
Tugir heilbrigðiseftirlitsstarfsmanna eru grunaðir um að hafa þegið mútur fyrir að votta kjöt neysluhæft.
Landbúnaðarráðherrann sagði að búið væri að koma í veg fyrir vandann og kjötvörurnar sköpuðu enga hættu. Hins vegar gætu áhrifin verið talsverð á efnahag landsins og áætlar hann að um 1,5 billjóna dollara viðskipti gætu verið í hættu.
JBS sem er stór framleiðandi á kjötvörum lýsti því yfir að í 33 af 36 kjötvinnslustöðvum yrðu ekki framleiddar neinar kjötvörur í þrjá daga. Þetta þýðir að framleiðslan dregst saman um 35%.