Saksóknari handtekinn í fíkniefnamáli

Bandaríska alríkislögreglan hefur handtekið mexíkóskan saksóknara sem er grunaður um aðild að glæpahring sem framleiddi og seldi ólögleg eiturlyf, svo sem heróín og kókaín, til Bandaríkjanna.

Edgar Veytia, ríkissaksóknari í Nayarit-ríki, var handtekinn á landamærum Bandaríkjanna í San Diego. Hann er í haldi á grundvelli handtökuskipunar frá dómstól í New York-ríki.

Veytia var handtekinn á brúnni milli San Diego og Tijuana-flugvallar. Ríkisstjóri Nayarit, Roberto Sandoval, segir að handtakan hafi komið eins og þruma úr heiðskíru lofti. Ekki hafi verið tiltekið nákvæmlega á hvaða grundvelli saksóknarinn var handtekinn en það verði væntanlega upplýst í dag.

Samkvæmt upplýsingum AFP er Veytia sakaður um að hafa tekið þátt í framleiðslu og sölu á heróíni, kókaíni, metamfetamíni og maríjúana, samsæri um framleiðslu og samsæri um sölu á eiturlyfjunum.

• Blogga um frétt