Fjórir slösuðust í miklum eldsvoða í fjölbýlishúsi í miðborg Kristiansand í morgun. Búið er að bjarga nokkrum út úr brennandi húsinu en óvíst er hvort fleiri séu þar inni en alls eru 18 með heimilisfesti í húsinu við Tollbodgata.
Slökkviliðið er að störfum og að sögn lögreglu hefur slökkviliðið leitað af sér allan grun um að fólk sé enn inni á fyrstu tveimur hæðum hússins. Fréttamaður norska ríkisútvarpsins var kominn á vettvang á undan slökkviliði og segir hann að eldurinn hafi logað út um glugga á fyrstu hæð hússins og dreifðist hratt upp á aðrar hæðir.
Einum íbúa tókst að komast út um glugga hússins en slökkviliðið bjargaði tveimur af þaki hússins. Einni konu var bjargað út úr brennandi byggingunni með aðstoð krana.