Gríðarleg sprenging varð í nágrenni alþjóðaflugvallarins í Damaskus í Sýrlandi í dag. Flugvöllurinn er í um 25 kílómetra fjarlægð frá borginni og heyrðu borgarbúar sprenginguna vel.
Samkvæmt upplýsingum mannréttindasamtakanna Syrian Observatory for Human Rights fylgdi mikill eldur í kjölfar sprengingarinnar. Líbönsk sjónvarpsstöð sem Hezbollah-samtökin reka, segja að mögulega hafi sprengingin orðið eftir loftárás ísraelska hersins. Í frétt sjónvarpsstöðvarinnar segir að henni hafi fylgt eyðilegging en ekkert mannfall.
Í frétt BBC segir að að Ísraelsher hafi gert nokkrar árásir í Sýrlandi í þeim tilgangi að hindra vopnaflutninga til Hezbollah-hreyfingarinnar.
Ísraelskur ráðherra, Israel Katz, staðfestir ekki beinlínis að sprengingin á flugvellinum sé af völdum loftárásar hers lands síns en segir við BBC að árásin „samræmist stefnu Ísraela“ um að hefta flutning vopna.
Hezbollah-hreyfingin hefur sent liðsmenn sína til átaka í Sýrlandi í nokkur ár. Hreyfingin styður ríkisstjórn landsins.