Í það minnsta 11 létu lífið þegar smárúta með of mörgum farþegum féll niður gil í fjalllendi í norðvesturhluta Pakistans í morgun. Meðal hinna látnu eru konur og börn.
„Þeir sem létu lífið gerðu það samstundis. Níu aðrir slösuðust og fjórir þeirra eru alvarlega slasaðir,“ sagði embættismaðurinn Faheedullah Khan við AFP-fréttastofuna.
Khan segir að rútan hafi hrapað ofan í gilið sem var 46 metra djúpt. Þrjár konur, sex ára stelpa og sjö ára strákur voru meðal hinna látnu.
Bílstjórinn missti stjórn á bifreiðinni í beygju en hálka var á veginum vegna snjóa. Khan bætti því við að farþegarnir hefðu verið of margir.