Vopnaðir þjófar gerðu sér lítið fyrir og stálu skartgripum fyrir um 5 milljónir evra, 563 milljónir króna, um miðjan dag í París í gær. Ránið tók ekki nema fimm mínútur.
Þjófarnir komu þjótandi inn í Buccellati-skartgripaverslunina við Rue de la Paix í 1. hverfi borgarinnar vopnaðir öxum og skammbyssu. Þeir létu greipar sópa í versluninni sem þykir ein sú fínasta í París.
Þjófarnir voru tveir, annar með lambhúshettu en hinn grímu, og skipuðu þeir starfsfólki og viðskiptavinum að halda sig til hlés á meðan þeir brutu sér leið í sýningarkassa með öxunum og fylltu poka sína með ránsfengnum. Fimm mínútum síðar voru þeir á bak og burt í flóttabifreið sem beið þeirra með sírenum á fyrir utan skartgripaverslunina.
Á mánudaginn voru skartgripaþjófar einnig á ferð í París en þá brutust tveir vopnaðir og grímuklæddir menn inn í íbúð í 16. hverfi og stálu þar hring sem metinn er á þrjár milljónir evra. Eigandi íbúðarinnar og ungir synir hennar ásamt fjölskylduvini voru öll í íbúðinni þegar ræningjarnir réðust inn. Að sögn lögreglu sluppu þau ómeidd. Ekki er vitað hvort um sömu menn er að ræða.