Vandræðalegt handaband Donalds Trump Bandaríkjaforseta og Emmanuels Macron Frakklandsforseta var „ekki saklaust“ heldur „stund sannleikans“. Þetta segir Macron í frönskum fjölmiðlum í dag.
Eins og mbl.is fjallaði um vakti handaband þjóðarleiðtoganna tveggja mikla athygli á dögunum, þegar þeir virtust vera í nokkurs konar þrjóskukeppni um það hvor sleppti fyrr. Leiðtogarnir hittust á fundi í Brussel á fimmtudag í tengslum við leiðtogafund NATO á fimmtudag.
Í frönskum fjölmiðlum í dag segist Macron hafa viljað sýna Trump að hann muni ekkert gefa eftir, en jafnframt muni hann ekki ofgera hlutina.
Handabandið sem um ræðir var nokkurra sekúndna langt og tókust þeir svo fast í hendur að hnúarnir á höndum þeirra urðu hvítir. Virtist hvorugur ætla að gefa eftir en þegar Trump sleppti á endanum hélt Macron enn í hann.
Fjölluðu fjölmiðlar vestanhafs um að með þessu hefði Macron líklega verið að senda Trump skilaboð, og hefur Macron nú staðfest það. Segir hann að með þessu hafi hann verið að ávinna sér virðingu Trumps. „Donald Trump, forseti Tyrklands eða forseti Rússlands sjá heiminn í ljósi valda og það angrar mig ekki,“ sagði hann. „Ég trúi ekki á ríkiserindrekstur í gegnum opinbera gagnrýni, en í samskiptum gef ég ekkert eftir. Þannig öðlast maður virðingu.“
Handaband Trumps hefur áður vakið athygli, en hann virðist oft grípa harkalega í fólk sem hann tekur í hendurnar á og jafnvel halda í það óvenjulega lengi.