Franski blaðamaðurinn Veronique Robert sem slasaðist þegar jarðsprengja sprakk í borginni Mósúl í Írak fyrr í vikunni er látinn. Þessu greinir vinnuveitandi hans, France Televisions, frá í yfirlýsingu í dag að því er fram kemur á fréttaveitu AFP.
Robert gekkst undir aðgerð í Baghdad en var svo flogið til Frakklands aðfaranótt föstudags. Þar lést hann af sárum sínum. Tveir fréttamenn til viðbótar létust í sprengingunni, annar franskur ríkisborgari og hinn íraskur.
Frétt mbl.is: Tveir blaðamenn létust í Mósúl
Harðir bardagar hafa geisað í og við Mósúl síðustu daga í tilraunum íraskra hersveita til að ná aftur hluta borgarinnar þar sem hið svonefnda Ríki íslams hefur ráðið lögum og lofum.
Hinir fréttamennirnir tveir sem létust voru að taka upp fréttaefni af bardaganum fyrir frönsku sjónvarpsstöðina 2 TV þegar sprengingin varð. Voru það Stephan Villeneuve myndatökumaður og Bakhtiyar Haddad, aðstoðarmaður hans, en þeir létust samstundis. Robert og annar franskur blaðamaður slösuðust í árásinni.
Írak er efst á lista yfir þau lönd í heimi þar sem hættulegast er fyrir blaða- og fréttamenn að starfa. Frá árinu 2014 hafa 27 blaðamenn, bæði menntaðir og ómenntaðir, verið myrtir í Írak samkvæmt upplýsingum frá samtökum Blaðamanna án landamæra (RSF).