Fyrrverandi ruðningshetjan og leikarinn OJ Simpson kemur nú fyrir nefnd sem ákveður hvort hann fái reynslulausn, eftir að hafa setið í níu ár í Nevada-fangelsinu. Nái hann að sannfæra nefndina um að hann eigi skilið að fá lausn, getur hann losnað úr fangelsi í haust. Simpson, sem er orðinn sjötugur, segist hafa afplánað sinn dóm.
Simpson var dæmdur í 33 ára fangelsi árið 2008 fyrir að hafa rænt tveimur mönnum sem sérhæfðu sig í sölu íþróttaminjagripa og haldið þeim á hótelherbergi í Las Vegas. Simpson hélt því fram að hann hefði verið að ná í gripi sem stolið hafði verið af honum.
Árið 1995 var hann sýknaður af því að hafa myrt fyrrverandi eiginkonu sína, Nicole Brown Simpson, og Ron Goldman. Tveimur árum síðar tapaði hann einkamáli sem fjölskyldur fórnarlambanna höfðuðu á hendur honum.
Til að losna úr fangelsi í haust þarf Simpson að sannfæra fjóra af sjö nefndarmönnum, sem hlusta á beiðnir um reynslulausn, um að hann hafi haldið sig frá áfengis- og eiturlyfjaneyslu í fangelsinu og hafi ekki „lent í slæmum félagsskap“.
Fundi Simpson með nefndinni er sjónvarpað beint og einn nefndarmaður spurði hvort hann hefði farið á betrunarnámskeið síðan hann sótti síðast um reynslulausn, en Simpson neitaði því. Hann hafi hins vegar tekið annað námskeið í því hvernig eigi að nota valmöguleika en ofbeldi í erfiðum aðstæðum.
Í frétt BBC um málið segir að sérfræðingar telji góða möguleika á því að hann fái reynslulausn vegna góðrar hegðunar í fangelsinu.