Tveir 16 ára drengir eru í haldi lögreglu grunaðir um að valda skógareldunum í Suður-Frakklandi. Þeir eru grunaðir um íkveikju í borginni Carro í frönsku rivíerunni en skógareldarnir eyðilögðu yfir 150 hektara landsvæði. Sky News greinir frá.
Drengirnir mæta fyrir rétt í dag. Verði þeir fundnir sekir gætu þeir átt yfir höfði sér 15 ára fangelsi.
Skógareldarnir sem hafa geisað í Frakklandi hafa verið skæðir. Rúmlega 10 þúsund manns þurftu að yfirgefa heimili sín vegna þeirra í vikunni.
Karlmaður á fimmtugsaldri mætir fyrir rétt í dag og er hann einnig sakaður að valda skógareldum, en þó fyrir slysni, í Peyen í Suðaustur-Frakklandi. Þar brunnu um 72 hektarar af ræktarlandi. Neisti kviknaði af vélsög sem maðurinn notaði við vinnu sína.