Flækingshundar finna líkin í leðjunni

Fjölmenni hefur safnast saman í kirkjum í Freetown í Síerra Leóne og reynir í sameiningu að vinna út úr sorginni sem fylgt hefur mannskæðum náttúruhamförum í landinu fyrir tæpri viku. Enn er látinna leitað í aurskriðunum miklu. Um 500 manns létust. 

„Ég loka augunum og hugsa til þess að þetta hefði getað veri ég,“ segir Angela Johnson sem mætti til messu í Kirkju  heilags Páls í Regent en á því svæði fórust flestir í hamförunum. „Þegar ég vakna sé ég aðeins myrkrið. Það hefði getað verið ég sem grófst undir, guð minn góður.“

Fyrir utan kirkjuna má sjá hæðina sem eitt sinn var þakin trjám. Þar blasir aðeins rauðgul moldin við eftir að gríðarleg skriða féll í kjölfar mikilla rigninga síðasta mánudag. Skriðan féll aðallega á eitt af fátæktarhverfum Freetown. Það var nótt er hún féll. Og íbúarnir flestir í fastasvefni.

Sjálfboðaliðar flytja lík sem fundust í skriðunni af vettvangi.
Sjálfboðaliðar flytja lík sem fundust í skriðunni af vettvangi. AFP

„Þetta var athöfn um vonina og huggunina, að við séum ein fjölskylda,“ sagði presturinn John Nat Tucker eftir messuna. „Við íbúar Síerre Leóne verðum að standa saman.“

Síerra Leóne er eitt fátækasta ríki heims. Björgunarstörf hafa gengið mjög erfiðlega enda vantar töluvert upp á tæknibúnað og þekkingu hjá heimamönnum til að fást við svo gríðarmiklar hamfarir. Þar sem björgunarstörfin hafa dregist á langinn þá hefur ekki tekist að koma líkunum af vettvangi og nú eru þau mörg orðin svo illa farin að ekki verður hægt að bera kennsl á þá sem fórust.

„Eini vélbúnaðurinn sem við höfum til að grafa á svæðinu eru átta gröfur,“ segir hershöfðinginn Abu Bakarr Sidique Bah, sem stjórnar aðgerðum á vettvangi. Svæðið er erfitt til leitar því það er mjög bratt og leðja liggur yfir öllu. Því er mjög erfitt að beita gröfunum við leitina. Það hefur orðið til þess að björgunarmennirnir fylgjast með flækingshundum þegar þeir reyna að grafa upp lík til að éta. Þannig finna þeir þá staði þar sem látna er að finna.

„Við erum ekki með neinar þyrlur eða leitarhunda eða sérfræðinga í réttarmeinafræði til að aðstoða okkur,“ útskýrir Bah. „Við notum bara það sem við getum í augnablikinu notum við berar hendur okkar og skóflur til að grafa og leita að líkum á svæðinu þar sem gröfurnar komast ekki að.“

Flækingshundar fara um skriðuna og þegar þeir finna lík reyna …
Flækingshundar fara um skriðuna og þegar þeir finna lík reyna þeir að grafa þau upp. Björgunarmenn hafa enga sporhunda sér til aðstoðar. AFP

Teymi spænskra réttarmeinafræðinga er nú komið á vettvang til aðstoðar. Þá hafa hermenn frá Líberíu komið til borgarinnar til að rétta fram hjálparhönd.

Talið er að 499 hafi grafist undir aurskriðunni, þar af 156 börn. Hins vegar er erfitt að meta fjöldann og því mögulegt að fleiri hafi farist. 

Verkfræðingurinn Thomas Bensonan segist hafa grafið lík systur sinnar og frænku upp úr aurskriðunni. Til þess hafi hann  notað berar hendur sínar. Hann missti níu ættingja er skriðan féll á mánudag. 

Hætta er nú á því að sjúkdómar á borð við kóleru brjótist út þar sem vatn hefur spillst vegna aursins. 

 Um 1,2 milljónir manna búa í Síerra Leóne. Borgaryfirvöld eiga í vandræðum með að aðstoða þá sem misstu hús sín í skriðunni við að finna annan samastað.

mbl.is
Fleira áhugavert
Fleira áhugavert