Að minnsta kosti tveir hafa látið lífið í jarðskjálfta sem mældist 4 stig að stærð á ítölsku eyjunni Ischia, skammt undan strönd Napólí, í gærkvöld. Alls slösuðust 39 manns þegar fjöldi bygginga hrundi. Tvær konur eru á meðal hinna látnu. BBC greinir frá.
Björgunarsveitir vinna hörðum höndum að því að bjarga fólki úr rústum húsanna. Þær unnu mikið björgunarafrek þegar þær losuðu tæplega sjö mánaða gamalt barn úr rústunum. Þær reyna nú að bjarga tveimur bræðrum barnsins sem eru fastir undir rúmi í húsinu sínu sem hrundi en ná að hafa samskipti við björgunarsveitarmenn gegnum síma.
Á eyjunni búa um 50 þúsund manns sem er vinsæl meðal ferðamanna einkum á þessum tíma. Þegar skjálftinn reið yfir var mikill fjöldi á veitingastöðum í bænum Casamicciola og búðir voru enn opnar. Mikil örvinglan greip um sig og fólk þusti um götur bæjarins.
Fjölmörg hús hrundu til grunna og einnig ein kirkja. Eldri kona lést þegar brak hrundi úr kirkjunni yfir hana. Hin konan sem lést fannst undir rústum húss sem hrundi.
Jarðskjálftar eru algengir á Ischia. Mannskæðasti skjálftinn sem riðið hefur yfir eyjuna var skjálfti upp á 5,8 sem varð rúmlega 2.000 manns að bana árið 1883.