Sýrlenskar mæðgur, sem voru áberandi í baráttunni gegn stjórnvöldum í heimalandinu, fundust látnar í íbúð sinni í Istanbúl í Tyrklandi.
Uppfært 23. september - samkvæmt fyrstu fréttum í gær kom fram að þær höfðu verið skornar á háls, samkvæmt tyrkneskum fjölmiðlum. Nú virðist sem þær hafi verið stungnar til bana.
Móðirin, Aroubeh Barakat, var þekktur stjórnarandstæðingur og aðgerðasinni í Sýrlandi en dóttir hennar, Halla Barakat, var blaðamaður. Það voru vinir þeirra sem höfðu samband við lögreglu eftir að ekki náðist í þær í síma.
Þegar lögreglan kom á vettvang í íbúð þeirra í Uskudar-hverfinu, sem er Asíumegin í Istanbúl, fann hún konurnar látnar.
Tæplega þrjár milljónir Sýrlendinga hafa flúið til Tyrklands frá því uppreisnin gegn einræðisstjórn Bashars al-Assads hófst í mars 2011.
Systir Aroubeh Barakat, Shaza, staðfestir andlát þeirra á Facebook og segir þær hafa verið ráðnar af dögum. Þær hafi verið stungnar til bana.
Hún segir að systir hennar hafi byrjað að mótmæla ofríki Assd-fjölskyldunnar á níunda áratug síðustu aldar þegar faðir núverandi forseta var við völd, Hafez.
Í frétt Yeni Safak kemur fram að Aroubeh Barakat hafi rannsakað ásakanir um pyntingar í fangelsum ríkisins. Hún hafi búið í Bretlandi og síðar í Sameinuðu arabísku furstadæmunum áður en hún flutti til Istanbúl.
Sýrlenski aðgerðarsinninn Rami Jarrah skrifaði á Facebook að fjölskyldan teldi að morðin tengdust aðgerðum Aroubeh gegn stjórnvöldum í Sýrlandi.
Halla Barakat, 22 ára, starfaði fyrir fréttavefinn Orient News og hafði einnig unnið fyrir tyrkneska ríkissjónvarpið.