Erlent | AFP | 22.9.2017 | 9:32

Sigur fyrir fórnarlömb Ríkis íslams

Baráttukonurnar Nadia Murad og Amal Clooney fylgdust með atkvæðagreiðslunni í öryggisráði Sameinuðu þjóðanna í gær. AFP

Mannréttindalögfræðingurinn Amal Clooney hefur fyrir hönd skjólstæðings síns, Nadiu Murad, sem var meðal annars tilnefnd til friðarverðlauna Nóbels, krafist þess að réttvísin nái fram að ganga og vígamönnum Ríkis íslams verði refsað fyrir brot sín gagnvart jasídum.

Öryggisráð Sameinuðu þjóðanna samþykkti einróma í gær að setja af stað rannsókn á fjöldamorðum á jasídum í Írak. Rannsóknarhópnum verður gert að safna gögnum um fjöldamorð vígasveita Ríkis íslams auk gagna tengdra öðrum grimmdarverkum vígasamtakanna á minnihlutahópum í Írak.

Það var fulltrúi Breta í öryggisráðinu sem lagði fram ályktunina en með henni er vonast til þess að hægt verði að draga ódæðismennina fyrir dóm. Amal Clooney, sem var viðstödd atkvæðagreiðsluna, hefur lengi barist fyrir réttindum minnihlutahópa í Írak.

Hún er lögmaður nokkurra jasída-kvenna sem voru teknar í gíslingu og notaðar sem kynlífsþrælar af vígamönnum Ríkis íslams. Konurnar voru teknar höndum þegar vígasamtökin fóru eins og stormsveipur um Sínaí-hérað í Írak í ágúst 2014.

Við hlið Amal Clooney sat Nadia Murad, sem er ein þeirra kvenna sem lifðu af, en hún hefur vakið verðskuldaða athygli fyrir baráttu sína gegn brotum gegn jasída-konum.

Clooney segir samþykktina sigur fyrir fórnarlömb Ríkis íslams sem hafa barist svo lengi fyrir því að réttvísin nái fram að ganga.

Með atkvæðagreiðslunni hafi Sameinuðu þjóðirnar sent kröftug skilaboð um að Ríki íslams geti ekki lengur framið þjóðarmorð, glæpi gegn mannkyninu og aðra stríðsglæpi að refsilausu. Fórnarlömb þeirra fái vonandi loksins að sjá réttvísinni framfylgt fyrir dómstólum.

Sameinuðu þjóðirnar segja morðin á jasídum þjóðarmorð og Clooney hefur undanfarinn mánuð herjað á ríki heims að fordæma aðgerðir Ríkis íslams gagnvart jasídum.

Jasídar eiga sér langa sögu. Ekki er nákvæmlega vitað hve margir þeirra búa í Írak en giskað hefur verið á hálfa milljón, flestir í afskekktum þorpum.

Ekki er hægt að ganga í söfnuðinn og honum tilheyra því einungis þeir sem fæðast innan vébanda hans. Margt í siðum jasída hefur orðið til að einangra hópinn frá öðrum, en trú þeirra á ýmislegt sameiginlegt með kristni og íslam.

Í trú jasída er hvorki til himnaríki né helvíti og þeir trúa á endurholdgun. Yfirgefi einhver söfnuðinn eða giftist út fyrir hann er viðkomandi ekki fyrirgefið.

Írak samþykkti loks í ágúst, eftir mikinn þrýsting, að hefja rannsókn á voðaverkum Ríkis íslams í landinu.