Jimmy Carter, fyrrverandi Bandaríkjaforseti, segist reiðubúinn til að fara til Norður-Kóreu á vegum Bandaríkjastjórnar og semja við þarlend yfirvöld. Þetta kom fram í viðtali við New York Times. Carter segist hafa látið þjóðaröryggisráðgjafa Trump, H.R. McMaster, vita að hann sé til staðar ef Trump þurfi á erindreka að halda í Norður-Kóreu.
Aðspurður viðurkennir Carter að vera smeykur við stjórnvöld í Norður-Kóreu og deilur Trumps við Kim Jong-un, leiðtoga Norður-Kóreu. „Þeir vilja bjarga stjórninni,“ segir Carter um Norður-Kóreumenn, og segir Bandaríkjamenn ofmeta áhrif Kína á Norður-Kóreu. „Kim Jong-un hefur aldrei, svo ég viti til, farið til Kína. Og þeir hafa engin sambönd. Kim Jong-il [faðir hans og fyrrverandi einræðisherra] fór til Kína og stóð Kínverjum nærri.
Forsetinn fyrrverandi hefur ágæta reynslu af viðræðum við Norður-Kóreu en hann hélt til einræðisríkisins árið 1994, í óþökk Bill Clinton þáverandi forseta, til að ræða við Kim Il-sung, þáverandi leiðtoga. Tókst honum þá að landa samningi þar sem Norður-Kóreustjórn skuldbatt sig til að losa sig við öll kjarnorkuvopn í skiptum fyrir þróunaraðstoð. Síðar kom þó í ljós að stjórnvöld í Pyongyang höfðu farið á bak við Bandaríkjamenn og haldið áfram þróun kjarnorkuvopna.
Þá fór hann til Norður-Kóreu árið 2010 til að semja um lausn bandarísks manns, Aijalon Gomes. Sá hafði verið enskukennari í Suður-Kóreu en var hnepptur í þrælkun eftir að hafa farið yfir landamærin í norðri í óleyfi. Hann var svo látinn laus eftir nokkra mánuði í haldi er Carter fór á fund einræðisherrans.
Carter fékk friðarverðlaun Nóbels árið 2002 fyrir áratugavinnu að friðsamlegum lausnum í milliríkjadeilum.