Tugir þúsunda Zimbabwebúa hafa nú safnast saman í höfuðborg landsins Harare til að krefjast afsagnar Robert Mugabes, forseta landsins. Mugabe, sem er 93 og hefur farið með völd í landinu frá því að það fékk sjálfsstjórn frá Bretum árið 1980, var hnepptur í stofufangelsi í vikunni eftir að herinn tók yfir völd í landinu.
Mótmælafundurinn í dag nýtur stuðnings hersins og segir fréttaritari BBC í Zimbabwe að mannfjöldinn fagni hermönnum á svæðinu.
Liðsmenn stjórnarflokksins Zanu-PF, sem og fyrrverandi hermenn, sem þar til í fyrra voru dyggir stuðningsmenn forsetans, segja nú að Mugabe eigi að segja af sér.
Mugabe hefur verið í stofufangelsi undanfarna daga, en kom fyrir almannasjónir á ný í gær í fyrsta skipti frá því að herinn tók yfir. Tók Mugabe þar þátt í útskriftarathöfn háskóla í Harare.
Herinn tók völdin í landinu í kjölfar þess að Mugabe rak varaforsetann Emmerson Mnangagwa frá völdum og gaf í skyn að eiginkona sín, Grace, væri betur til þess fallin að taka við af sér og leiða Zanu-flokkinn.
Hafa yfirmenn hersins sagst eiga í viðræðum við Mugabe og að þeir muni upplýsa almenning um niðurstöður þeirra viðræðna jafn fljótt og auðið er.
Stjórnarandstöðuflokkurinn ZDF sagði í yfirlýsingu á föstudag að skipuleggjendur mótmælendanna hefðu sett sig í sambandi við þá og um samstöðu göngu væri að ræða.
„ZDF tilkynnir því hér með að á meðan að gangan fer fram á friðsamlegan og skipulagðan hátt ... án hatursorðræðu eða þess að kvatt sé til ofbeldis, þá styður flokkurinn gönguna.“
Aðrir stjórnarandstöðuflokkar eru einnig sagðir hafa lýst yfir sínum stuðningi við gönguna.