Eiginmaður Janne Jemtland, norsku konunnar sem saknað hefur verið frá því fyrir áramót, hefur verið úrskurðaður í fjögurra vikna gæsluvarðhald grunaður um að hafa orðið konunni að bana.
Eiginmaðurinn hefur áður komist í kast við lögin því hann fékk dóm fyrir alvarlega líkamsárás árið 1991. Þá hefur hann einnig verið dæmdur fyrir þjófnað og eignaspjöll, að því er fram kemur á vef TV2 í Noregi.
Janne, sem er tveggja barna móðir, hvarf sporlaust aðfaranótt 29. desember eftir að hún kom heim úr veislu ásamt eiginmanni sínum. Hann tilkynnti þó ekki um hvarf hennar fyrr en tæpum sólarhring síðar. Þá leið sólarhringur til viðbótar þar til lögregla hóf formlega leit.
Frétt mbl.is: Líkfundur í Noregi
Lík fannst loks eftir 15 daga leit á botni árinnar Glomma um 50 kílómetra frá smábænum Brumunddal þar sem hún bjó. Þó enn eigi eftir að staðfesta að líkið sé hennar má telja nær öruggt að svo sé. Börn þeirra eru nú í umsjá barnaverndar.
Maðurinn gistir nú fangageymslur í einangrun meðan unnið er að rannsókn málsins.