Lögreglan í Noregi hefur staðfest að lík sem fannst í ánni Glomma á laugardag er lík Janne Jemtland.
18 dagar eru frá því að Jemtland hvarf frá heimili sínu í Brumunddal, litlu bæjarfélag inni í landi, mitt á milli Hamars og Lillehammer.
Eiginmaður Jemtland var í gær úrskurðaður í fjögurra vikna gæsluvarðhald, grunaður um að hafa myrt eiginkonu sína. Hann vísaði lögreglunni á líkið, en neitar að hafa valdið dauða hennar.
Í tilkynningu frá lögreglunni sem gefin var út í dag kemur fram að dánarorsök eru ekki kunn og að endanlegar niðurstöður krufningar liggi ekki fyrir.
Hjónin eiga tvö börn og eru þau nú í umsjá barnaverndar.