„Vildi að ég gæti breytt fortíðinni“

Fangi á dauðadeild í Texas í Bandaríkjunum kvartaði undan mikilli brunatilfinningu þegar hann fékk banvæna sprautu þar sem hann var tekinn af lífi í gærkvöldi. Anthony Allen Shore varð þar með fyrsti fanginn í Bandaríkjunum á árinu sem er tekinn af lífi.

„Úfff, ég finn fyrir þessu,“ sagði Shore þegar hann fann fyrir brunanum. Shore bað fórnarlömb sín afsökunar áður en hann var tekinn af lífi. Shore játaði að hafa myrt konu og þrjár stúlkur og óskaði eftir dauðarefsingu við réttarhöld.

Öll fórnarlömbin voru af spænskum ættum en hann framdi morðin yfir níu ára tímabil, það fyrsta árið 1986. Shore nauðgaði þremur fórnarlambanna áður en hann kyrkti þær.

Hann var dæmdur fyrir morð árið 2004 eftir að lífsýni, sem lögregla hafði tekið þegar hann var dæmdur fyrir barnaníð árið 1998, fannst á einu fórnarlamba hans.

„Engin orð geta tekið til baka það sem ég gerði,“ sagði Shore þegar síðustu andartökin runnu upp hjá honum.

„Ég vildi að ég gæti breytt fortíðinni en svona er þetta,“ sagði Shore sem lést 13 mínútum eftir að hann var sprautaður með banvænu eitri.

Frétt BBC.

• Blogga um frétt