Stjórn fimleikasambandsins sagði af sér

Larry Nassar, fyrrverandi lækn­ir banda­ríska fim­leika­landsliðsins, mætir fyrir rétt í …
Larry Nassar, fyrrverandi lækn­ir banda­ríska fim­leika­landsliðsins, mætir fyrir rétt í síðustu viku. AFP

Aðalstjórn bandaríska fimleikasambandsins sagði af sér á sunnudaginn. Afsögnin kemur í kjölfar réttarhalda yfir fyrrverandi lækni liðsins, Larry Nassar, sem hefur viðurkennt að hafa misnotað fjölmargar fimleikakonur í starfi sínu fyrir sambandið. Dómur verður kveðinn upp yfir Nassar í vikunni. BBC  greinir frá. 

„Við styðjum ákvörðun þeirra um að segja af sér,“ segir Kerry Perry, forseti og framkvæmdastjóri bandaríska fimleikasambandsins, eftir að Paul Parilla stjórnarformaður, Jay Binder varastjórnarformaður og gjaldkerinn Bitsy Kelley sögðu af sér á sunnudaginn. 

Hún sagði jafnframt að með afsögn þeirra væri unnt að halda áfram og innleiða breytingar í sambandinu. Þar til ný stjórn verður formlega kosin mun bráðabirgðastjórn starfa.    

Yfir 140 konur, þar á meðal fjölmargir ólympíumeistarar í fimleikum, hafa sakað Nassar um kynferðislega misnotkun. Hann hefur þegar hlotið 60 ára dóm eftir að hafa játað vörslu barnakláms. 

mbl.is
Fleira áhugavert
Fleira áhugavert