Ekki hafa borist neinar fréttir af meiðslum á fólki né miklum skemmdum á byggingum í jarðskjálftanum sem reið yfir suðurströnd Alaska klukkan 9:31 að íslenskum tíma, klukkan 00:31 að staðartíma.
Flóðbylgjuviðvörun var gefin út strax eftir skjálftann en hann mældist 7,9 stig. Viðvörunin var gilti fyrir Alaska og Bresku-Kólumbíu en einnig var gefin út viðvörun, en vægari, fyrir Kaliforníu og Oregon auk hluta Washington-ríkis. Nokkru síðar var viðvöruninni breytt í ráðleggingu og klukkan 3:15 að staðartíma höfðu ekki borist neinar tilkynningar um stórar öldur eða skemmdir.
Miðja skjálftans var 290 km suðaustur af Kodiak og voru upptök hans á 10 km dýpi. Líkt og fram hefur komið á mbl.is var í fyrstu talið að skjálftinn hefði verið 8,2 stig en síðar lækkaður í 7,9 stig.
Skjálftinn fannst víða og mjög vel í Anchorage þrátt fyrir að vera í mikilli fjarlægð frá upptökum skjálftans. Íbúar í Kodiak segja að sjávarhæðin hafi eitthvað aukist en ekki mikið. Margir íbúanna hafa yfirgefið heimili sín nálægt ströndinni og eru nokkur hundruð íbúar í fjöldahjálparmiðstöð sem opnuð var í menntaskóla bæjarins.
Uppfært 13:01
AFP-fréttastofan greindi frá því nú um hádegi að búið sé að aflétta flóðbylgjuviðvöruninni. Áður höfðu almannavarnir Alaska greint frá því að engar fréttir um skemmdir hafi enn borist.