Heilagt klaustur í ljósum logum

Eldur kom upp í einu merkasta klaustri búddista í Lhasa, höfuðborg Tíbet, í gær. Samkvæmt upplýsingum frá kínverskum yfirvöldum urðu engin slys á fólki en athygli vekur að yfirvöld reyndu að koma í veg fyrir að fréttir af eldsvoðanum næðu útbreiðslu á samfélagsmiðlum. 

Jokhang-klaustrið í Tíbet, sem er sjálfsstjórnarhérað í Kína, er yfir þúsund ára gamalt og er í heimsminjaskrá UNESCO.

Þak klaustursins varð verst úti í brunanum en BBC hefur eftir kínverskum yfirvöldum að vel gekk að ná tökum á eldinum og tekist hefði að slökkva hann stuttu eftir að hann kom upp. Engar skemmdir hafa orðið á menningarlegum minjum.

Götum umhverfis klaustrið var lokað eftir að eldurinn kom upp í gærkvöldi en voru opnaðar aftur í dag. Höfuðborgin, Lhasa, er álitin heilög af íbúum Tíbet en klaustrið er allra heilagasti staður borgarinnar. Íbúum var því sérstaklega brugðið þegar eldurinn kom upp.

• Blogga um frétt