Erlent | mbl | 20.2.2018 | 7:23

Útför Hinriks prins í dag

Almenningi gafst kostur á að kveðja Hinrik prins þar til í gær er kista hans stóð í hallarkirkjunni í Christiansborg. Aðeins um sextíu manns er boðið að vera við útförina. AFP

Um sextíu aðstandendur og nánir vinir Hinriks prins, eiginmanns Margrétar Danadrottningar, verða viðstaddir útför hans í dag.

Útförin verður gerð frá hallarkirkjunni í Christansborg og hefst athöfnin klukkan 11 að dönskum tíma, klukkan 10 að íslenskum.

Þrír kórar munu syngja við útförina, m.a. Drengjakór Kaupmannahafnar en Hinrik var verndari kórsins í 45 ár.

Tíu menn úr konunglegu lífvarðarsveitinni munu bera kistuna frá kirkju.

Í kjölfar athafnarinnar munu syrgjendur koma saman í Amalíuborg.

Lík Hinriks verður brennt. Helmingi öskunnar verður dreift yfir sjó við strendur Danmerkur og hinn helmingurinn verður jarðsettur í einkagrafreit við höllina í Fredensborg. Almennur aðgangur verður ekki að leiðinu að því er sagði í fréttatilkynningu frá dönsku konungsfjölskyldunni.

Hinrik lést í síðustu viku, 83 ára að aldri.

Bein lýsing danska ríkisútvarpsins frá útförinni.