Donald Trump Bandaríkjaforseti mun í dag tilkynna um efnahagsþvinganir í garð 56 vöruflutningafyrirtækja og annarra fyrirtækja sem tengjast Norður-Kóreu.
Mike Pence, varaforseti Bandaríkjanna, boðaði þvinganirnar fyrr í þessum mánuði.
Í broti úr ræðu Trumps kemur fram að efnahagsþvinganirnar séu þær umfangsmestu gagnvart Norður-Kóreu til þessa.
„Í dag tilkynni ég umfangsmestu efnahagsþvinganirnar til þessa gegn stjórnvöldum í Norður-Kóreu,“ kemur fram í ræðu forsetans.
Brugðið er á þetta ráð til að koma í veg fyrir að stjórnvöldin þar í landi geti haldið áfram að fjármagna kjarnorkuáætlun sína.
Með aðgerðunum eiga fyrirtækin sem um ræðir ekki lengur að geta aðstoðað Norður-Kóreu við að fara ekki eftir þeim efnahagsþvingunum sem þegar hafa verið settar.