Ekkert hefur spurst til manns sem skaut fjóra til bana á veitingastað í Nashville, Tennessee frá því skömmu eftir árásina aðfaranótt sunnudags.
Að sögn lögreglu í Nashville sást morðinginn, Travis Reinking, 29 ára, fyrir utan fjölbýlishúsið sem hann býr, í gærmorgun. Hans er því enn leitað og svæðið enn lokað fyrir gestum. Reinking kom inn á veitingastaðinn vopnaður riffli og skammbyssu og nakinn að öðru leyti en því að klæðast jakka.
Yfirvöld í Tennessee hafa staðfest að Taurean Sanderlin, 29 ára, Joe Perez, 20 ára og Deebony Groves, 21 árs hafi látist á vettvangi en fjórða fórnarlambið, Akilah Dasilva, 23 ára hafi látist á sjúkrahúsi. Tveir særðust í árásinni.
Lögreglan telur að Reinking hafi losað sig við jakkann þegar hann flúði heim eftir árásina. Þar klæddist hann nærbrók og hljóp út í skóg.
Áður en honum tókst að flýja af vettvangi náði James Shaw, 29 ára, að afvopna hann en Shaw náði af honum rifflinum eftir að hafa falið sig fyrir skothríðinni inni á salerni. Hann kom þannig í veg fyrir að Reinking næði að skjóta fleiri.
„Þú færð ekki að hitta margar hetjur á lífsleiðinni en Shaw þú ert hetjan mín. Þú bjargaðir lífi fólks,“ sagði framkvæmdastjóri veitingastaðarins Waffle House, Walt Ehmer, við Shaw í gær en sá síðarnefndi vill lítið gera úr afrekum sínum í samtali við fjölmiðla.
„Ég gerði þetta til þess að bjarga sjálfum mér,“ sagði Shaw við fréttamenn.