Erlent | AFP | 27.4.2018 | 6:37 | Uppfært 7:44

Vissi um samkomulagið

Forseti Bandaríkjanna, Donald Trump, viðurkenndi í gærkvöldi að hann hefði vitað af samkomulaginu sem persónulegur lögmaður hans, Michael Cohen, gerði við klámmyndaleikkonuna Stormy Daniels. Hingað til hefur Trump neitað því að hafa vitað að Cohen hafi greitt Daniels 130 þúsund Bandaríkjadali til þess að koma í veg fyrir að hún tjáði sig um meint samband hennar við forsetann árið 2006.

Þetta kom fram í símaviðtali við Trump á sjónvarpsstöðinni Fox í gærkvöldi í þættinum „Fox and Friends“. Trump hefur aldrei fyrr viðurkennt að Cohen hafi verið hans fulltrúi í samningaviðræðunum við Daniels sem hefur höfðað mál til þess að fá samkomulaginu um þögn hnekkt. Að sögn Trump annast Cohen aðeins einstaka mál fyrir hann. Þar á meðal hafi hann séð um að gera þennan „klikkaða“ samning við Stormy Daniels.

„Og eins og þetta horfir við mér gerði hann nákvæmlega ekkert rangt,“ sagði Trump í þættinum í gær. „Það voru engir kosningasjóðir nýttir í þetta.“

Þegar Trump var spurður út í fyrri ummæli sín um að hann hefði ekki vitað af samkomulaginu við Daniels svaraði hann því til að það væri Cohens að svara því. „Þú verður að spyrja Michael Cohen. Michael er lögmaður minn. Þú verður að spyrja Michael,“ sagði Trump.

Daniels hefur greint frá því að þau hafi sofið saman einu sinni en að Trump hafi margítrekað reynt að endurnýja kynnin. Hún segist hafa skrifað undir samning ellefu dögum fyrir forsetakosningarnar árið 2016 um að segja ekki frá sambandi sínu við Trump og fyrir vikið hafi hún fengið áðurnefnda 130 þúsund dollara. Michel Cohen, lögmaður Trump til margra ára, hefur viðurkennt að hafa afhent leikkonunni þessa peninga, en ekki sagt hvers vegna.

Donald og Melania Trump gengu í hjónaband árið 2005.