Mike Pompeo, utanríkisráðherra Bandaríkjanna, segir að ákvörðun um hvort verði af leiðtogafundi Donalds Trumps Bandaríkjaforseta og Kim Jong-un, leiðtoga Norður-Kóreu, sé alfarið í höndum hins síðar nefnda.
Pompeo sat fund utanríkismálanefndar fulltrúardeildar Bandaríkjaþings í dag þar sem hann var meðal annars spurður hvort leiðtogafundurinn færi fram.
Til stendur að fundurinn verði haldinn í Singapúr 12. júní. Óvissa ríkir nú um fundinn þar sem stjórnvöld í Norður-Kóreu hótuðu í síðustu viku að hætta við leiðtogafundinn ef Bandaríkin gera kröfu um að Norður-Kórea eyði öllum sínum kjarnorkuvopnum einhliða.
„Hann [Kim Jong-un] óskaði eftir fundinum, forsetinn samþykkti að hitta hann,“ segir Pompeo, sem er vongóður um að fundurinn muni eiga sér stað.
Trump sagði í gær að líklegt væri að fundinum yrði frestað um óákveðinn tíma.