Vildi að sérfræðingar fylgdust með lokuninni
Setja bókamerki
Antonio Guterres, aðalritari Sameinuðu þjóðanna, fagnaði í dag fréttum af því að kjarnorkutilraunasvæði Norður-Kóreu hefði verið jafnað við jörðu. Hann kvaðst engu að síður vera þeirrar skoðunar að alþjóðlegir sérfræðingar hefðu átt að vera á staðnum til að fylgjast með.
„Það er miður að alþjóðlegum sérfræðingum hafi ekki verið boðið að vera vitni að lokun svæðisins,“ sagði í yfirlýsingu frá Guterres.
Þá kvaðst hann einnig vera verulega áhyggjufullur yfir að bandarísk stjórnvöld hafi hætt við fyrirhugaðar viðræður Donald Trumps Bandaríkjaforseta og Kim Jong-un, leiðtoga Norður-Kóreu.
Ráðamenn í Norður-Kóreu buðu erlendum blaðamönnum að vera viðstaddir lokun svæðisins í Hamgyong og hafa þeir lýst röð sprenginga sem hljómuðu í gegnum daginn er neðanjarðargöng á tilraunasvæðinu voru sprengd. Þá voru herskálar og aðrar byggingar einnig eyðilagðar.
Kvaðst Guterres þó vona að þessi „traustvekjandi aðgerð muni ýta undir tilraunir til að koma á viðvarandi friði og sannanlegri afvopnavæðingu kjarnorkuvopna á Kóreuskaga.“
Allar sex kjarnorkutilraunir Norður-Kóreu voru framkvæmdar á svæðinu, m.a. síðasta og öflugasta tilraunin sem var gerð í september í fyrra.
Segir óábyrgt að skipta út öllu bankaráðinu
Stóraukið fé til samgöngusáttmála
Mikil skjálftavirkni á landinu áhyggjuefni
„Þögnin er ærandi“
Ofsóttur innan veggja Boeing
Hafa samþykkt kaup fyrir um 9,2 milljarða
Kveðst tala af virðingu: „Ég er enginn dóni“