Flúði úr fangelsi og rændi níu banka

Spænska lögreglan greindi frá því í dag að hún hefði handsamað 66 ára gamlan karlmann sem grunaður væri um að hafa rænt níu banka síðan hann lét sig hverfa í síðasta mánuði eftir að hafa fengið leyfi úr fangelsi.

Fram kemur í frétt AFP að maðurinn, sem yfirvöld telja að hafi stundað það að ræna banka í yfir 35 ár, var handtekinn á hóteli í úthverfi Madrid, höfuðborgar Spánar, þar sem hann hafði keypt sér gistingu. Hann hafði verið á flótta síðan í apríl þegar hann skilaði sér ekki til baka í fangelsi í nágrenni höfuðborgarinnar.

Lögreglan segir að maðurinn hafi notað sömu aðferð við öll bankaránin. Hann hafi klætt sig upp á í betri föt og sýnt starfsmönnum bankanna skammbyssu áður en hann bað þá vinsamlegast um að afhenda sér reiðufé. Maðurinn lét sig síðan hverfa af vettvangi með aðstoð almenningssamgangna. 

• Blogga um frétt