Þrír menn eru látnir eftir að hafa orðið fyrir lest nálægt Loughborough í London að því er fram kemur á fréttavef BBC. Sjúkralið var kallað á vettvang um hálf átta í morgun að staðartíma vegna tilkynninga um látið fólk.
Lögreglumenn eru enn á vettvangi og reyna að bera kennsl á líkin en mennirnir eru taldir hafa verið á þrítugsaldri. Lögreglan hefur staðfest að mennirnir hafi verið látnir í nokkra stund áður en hún mætti á staðinn.
„Við erum enn að reyna finna lestina sem lenti á einstaklingunum,“ sagði lögreglustjórinn Matt Allingham.
Fjölskyldu eins mannsins hefur verið greint frá fréttunum en unnið er að því að hafa uppi á fjölskyldum hinna tveggja.
Dauðsföllin eru óútskýrð á þessari stundu og rannsakar lögreglan nú hvers vegna mennirnir voru á lestarteinunum. Greint hefur verið frá því að spreybrúsar hafi fundist nálægt þeim látnu.
„Rannsóknarteymið mitt vinnur nú hörðum höndum við að skilja hvað gerðist hérna og hvernig andlát þessara þriggja aðila bar að,“ sagði rannsóknarlögreglumaðurinn Gary Richardson við BBC.
Hann bað þá sem voru nálægt slysstaðnum í morgun eða þá sem sáu eitthvað sem gæti skipt máli varðandi rannsóknina að hafa samband við lögregluyfirvöld.
Samgönguyfirvöld hafa varað við seinkunum á lestarferðum vegna rannsóknarinnar.
Fréttin hefur verið uppfærð.