Rússneska andófshópurinn Pussy Riot stóð fyrir mótmælum á úrslitaleik HM í Rússlandi í dag, er fjórar liðskonur sveitarinnar hlupu inn á völlinn á meðan leikurinn var í fullum gangi, íklæddar lögreglubúningum.

Hópurinn hefur frá stofnun verið gagnrýnin á stjórnvöld í Rússlandi og hafa liðsmenn hans verið fangelsaðir fyrir gjörninga þar sem stjórn Vladimírs Pútín Rússlandsforseta er gagnrýnd.

Pussy Riot birti yfirlýsingu á Twitter-síðu sinni skömmu eftir að konurnar hlupu inn á völlinn, þar sem settar voru fram sex kröfur á hendur rússneskum stjórnvöldum.

Hópurinn hljóp inn á völlinn í gervi „himneska lögreglumannsins“, sem var sköpunarverk rússneska skáldsins Dmitry Prigov.

„Himneski lögreglumaðurinn“, samkvæmt samkvæmt sagnaheimi Prigovs, á í tvíhliða samskiptum við sjálfan guð á himnum, á meðan „lögreglumaðurinn á jörðinni“ býr sig undir að ráðast að stjórnmálaviðburðum, sem eru stjórnvöldum ekki að skapi, samkvæmt yfirlýsingu Pussy Riot.

Án þess að við köfum of djúpt í samanburðinn á lögreglumönnunum tveimur er annars vegar um að ræða góðar löggur og hins vegar slæmar löggur.

Kröfur Pussy Riot eru, samkvæmt tístinu:

1. Að öllum pólítískum föngum verði sleppt.
2. Að fólk fari ekki í fangelsi fyrir „like“ á samfélagsmiðlum.
3. Að ólöglegum handtökum á stjórnmálaviðburðum verði hætt.
4. Að samkeppni í stjórnmálum verði leyfð í Rússlandi.
5. Að stjórnvöld hætti að ásaka fólk um glæpi og halda þeim í fangelsi fyrir engar sakir.
6. Að „lögreglumaðurinn á jörðinni“ breytist í „himneska lögreglumanninn“.

Mikill sprettur var á mótmælendum í dag. AFP

Tengdar fréttir

Pussy Riot

Íslensk liðskona Pussy Riot eftirlýst

• Liðsmenn Pussy Riot öðlast íslenskan ríkisborgararétt
• Neita að gefa upplýsingar um neyðarvegabréf
• Pussy Riot til landsins í nóvember
• Liðsmenn Pussy Riot fá hæli í Svíþjóð

» Fleiri tengdar fréttir

• Blogga um frétt