Erlent | AFP | 19.8.2018 | 16:20 | Uppfært 16:47

Bendir á Kínverja í stað Rússa

John Bolton, þjóðaröryggisráðgjafi Bandaríkjanna. AFP

Þjóðaröryggisráðgjafi Bandaríkjanna, John Bolton, telur að önnur ríki en Rússland kunni að hafa haft afskipti af kosningum í Bandaríkjunum. Í tísti Donalds Trump Bandaríkjaforseta í gær sagði Trump kjánalegt hversu margir einblíndu á hugsanleg afskipti Rússa af kosningunum í stað þess að horfa til Kína.

All of the fools that are so focused on looking only at Russia should start also looking in another direction, China. But in the end, if we are smart, tough and well prepared, we will get along with everyone!
— Donald J. Trump (@realDonaldTrump) August 18, 2018

„Ég get sagt að við höfum áhyggjur af afskiptasemi Kína, Írans eða Norður-Kóreu sem þjóðaröryggislegu vandamáli,“ sagði Bolton í samtali við This Week á ABC. Sagði hann bandarísk stjórnvöld vera að grípa til aðgerða þannig að koma megi í veg fyrir slíkan vanda.

Trump hefur undanfarið gagnrýnt harðar rannsókn Roberts Muellers á meintum afskiptum Rússa af forsetakosningunum í Bandaríkjunum árið 2016.